USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Həbsdə olan Anar Məmmədlinin səhhəti pisləşib, ailəsi tibbi yardım tələb edir
Seçkilərin Monitorinqi və Demokratiyanın Tədrisi Mərkəzinin (SMDT) rəhbəri, hüquq müdafiəçisi Anar Məmmədlinin səhhətində ciddi problemlər yaranıb. Bu barədə məlumatı onun ailəsi sentyabrın 26-da keçirilən görüşdən sonra yayıb.
Ailəsinin sözlərinə görə, Məmmədli uzun müddətdir diz oynağının artrozu – qonartroz xəstəliyindən əziyyət çəkir. Xəstəlik kəskinləşdiyi üçün hüquq müdafiəçisinin yeriməsi çətinləşib, diz nahiyəsində şişkinlik və qızartı müşahidə olunur. Mütəxəssislərin rəyinə əsasən, vəziyyətin bursit (oynaqdaxili kisənin iltihabı) və sinovit (oynaqdaxili qişanın iltihabı) ilə bağlı ola biləcəyi ehtimal edilir.
Həkimlər bu xəstəliyin davamlı nəzarət tələb etdiyini, MRT, rentgen və laborator müayinələrin vacibliyini bildirirlər. Lakin ailə deyir ki, Məmmədli artıq 17 aydır tibbi müayinələrdən keçirilməyib. Onun vəkillərinin mülki xəstəxanada hərtərəfli müayinə aparılması üçün müraciətləri isə dəfələrlə rədd edilib.
Məmmədlinin saxlanıldığı rütubətli və nəm şərait də səhhətini ağırlaşdırır. Ailə xəbərdarlıq edir ki, hüquq müdafiəçisi təcili tibbi yardım almasa, onun məhkəmə proseslərində iştirakı mümkünsüz ola bilər.
Xatırladaq ki, Anar Məmmədli 2024-cü il aprelin 29-da saxlanılıb. O, əvvəlcə Cinayət Məcəlləsinin 206.3.2-ci (qaçaqmalçılıq, qrup halında törədildikdə) maddəsi ilə ittiham olunub. Sonradan ona qarşı bir neçə maliyyə cinayəti maddəsi də əlavə edilib.
Beynəlxalq insan haqları təşkilatları Məmmədlini siyasi məhbus kimi tanıyır və onun dərhal azadlığa buraxılmasını tələb edirlər.
