USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
ABŞ 200 minə yaxın əcnəbinin vizasını ləğv etməyə hazırlaşır
ABŞ Dövlət Departamentinin ölkədə sığınacaq üçün müraciət etmiş 200 minə yaxın əcnəbinin vizasını ləğv etməyə hazırlaşdığı bildirilir.
“Associated Press” (AP) avqustun 24-də Dövlət Departamentindəki anonim rəsmilərə istinadən məlumat yayıb ki, plan həyata keçirilərsə, bu, ABŞ tarixində bir dəfəyə ən çox sayda vizanın ləğvi ilə nəticələnə bilər.
Məlumata görə, Dövlət Departamentinin qərarı qarşıdakı bir neçə həftə ərzində açıqlaması gözlənilir.
Planın son 10 il ərzində ABŞ-yə biznes və ya turist vizası ilə daxil olmuş, daha sonra isə ölkədə sığınacaq üçün müraciət etmiş əcnəbiləri əhatə edəcəyi bildirilir.
ABŞ dövlət katibinin müavini Kristofer Landau avqustun 24-də sosial şəbəkədə paylaşdığı açıqlamada planın mövcudluğunu dolayı şəkildə təsdiqləyib.
“ABŞ və bütün dünyada insanlar uydurma sığınacaq iddialarından təngə gəliblər. Sığınacaq sistemi immiqrasiya qanunlarından yan keçmək üçün bir boşluq kimi nəzərdə tutulmayıb”, – Landau bildirib.
Məlumata görə, son il yarım ərzində Dövlət Departamenti artıq 175 mindən çox əcnəbinin vizasını ləğv edib. Rəsmi qurum bu qərarların bir hissəsini sərxoş vəziyyətdə avtomobil idarəetmə, quldurluq və cinsi zorakılıq da daxil olmaqla müxtəlif cinayətlərə görə məhkumluq halları ilə əsaslandırıb.
Bundan başqa, ABŞ-nin Yaxın Şərq siyasətinə və İsrailə qarşı açıq mövqe nümayiş etdirən bəzi şəxslərin də vizalarının ləğv edildiyi bildirilir.
200 minə yaxın şəxsi əhatə edən yeni planın dəqiq tətbiq mexanizmi və hansı kateqoriyadan olan sığınacaq müraciətçilərinə şamil ediləcəyi barədə bütün detallar hələ açıqlanmayıb.
