Dekabrın 8-də Bakı Ağır Cinayətlər Məhkəməsində “Toplum TV işi” üzrə növbəti məhkəmə iclası keçirilib. Prosessə hakim Azər Tağıyev sədrlik edib və iclas şahidlərin dindirilməsi ilə davam etdirilib.

Məhkəmə zamanı təqsirləndirilən şəxslərdən – Toplum TV-nin həmtəsisçisi, media eksperti Ələsgər Məmmədlinin halı pisləşib. Onun təzyiqi yüksəlib, ürək nahiyəsində narahatlıq yaranıb. Məhkəmə zalına çağırılan tibbi briqada Məmmədlini müayinə edib və ona dərman preparatı verib.

Təqsirləndirilən şəxslərdən biri, Toplum TV jurnalisti Fərid İsmayılov isə məhkəmədə yeni vəsatət qaldırıb. O, müsahibə aldığı Milli Məclis üzvlərinin də məhkəmədə şahid qismində dindirilməsini istəyib. Jurnalist bunu belə əsaslandırıb:

“Şahidlər sadəcə məni jurnalist kimi tanıdıqlarını deyiblər. Bu, necə cinayət ola bilər? Əgər kimisə tanımaq cinayət hesab olunursa, onda xalq artistlərini də tutsunlar, çünki onları da hamı tanıyır”.

Məhkəmə prosesinin növbəti iclası dekabrın 15-nə təyin olunub. Bu dəfə məhkəməyə gəlmək imkanı olmayan şahidlərin onlayn şəkildə dindirilməsi nəzərdə tutulur.

Xatırladaq ki, “Toplum TV işi” ilə bağlı həbslər 2024-cü ilin martında başlayıb və ümumilikdə 10 nəfər bu iş üzrə cinayət məsuliyyətinə cəlb olunub. Onlar əvvəlcə qaçaqmalçılıqda ittiham olunublar, daha sonra ittihamlar ağırlaşdırılıb.