Rusiya prezidentinin Suriya nizamlanması üzrə xüsusi nümayəndəsi Aleksandr Lavrentyev Astana formatında keçirilən danışıqlarda Türkiyə tərəfinə Suriyanın ərazi bütövlüyü məsələsinin həllinin vacibliyini bildirib.

Onun sözlərinə görə, bütün tərəflər Suriyada vəziyyətin sabitləşməsində maraqlıdırlar və buna görə də “Astana” prosesinin qarantı ölkələri (İran, Rusiya, Türkiyə) Suriyanın suverenliyi və ərazi bütövlüyünə sadiqliklərindən danışırlar.

Lavrentyev Türkiyə Xarici İşlər Nazirliyinin ikitərəfli siyasi əlaqələr üzrə baş direktoru Ünal Səlcukun başçılıq etdiyi türk nümayəndə heyəti ilə görüşdə deyib: “Ancaq gördüyümüz kimi, çətinliklər var, onları həll etmək lazımdır”.
Lavrentyevin rəhbərlik etdiyi Rusiya nümayəndə heyəti artıq Suriya və İran hökumətlərinin nümayəndə heyətləri ilə ikitərəfli danışıqlar aparıb.
İran nümayəndə heyətinin rəhbəri Əli Əsgər Hacı Lavrentyevlə danışıqlardan sonra Suriyada hadisələrin inkişafı ilə bağlı Moskva və Tehranın mövqelərinin yaxınlığı barədə jurnalistlərə açıqlama verib.

Xatırladaq ki, dekabrın 21-də Nur-Sultan Suriyada nizamlanma üzrə “Astana” formatında danışıqlara başlayıb. İki gün davam edəcək məsləhətləşmələrdə qarant ölkələr - İran, Rusiya və Türkiyə ilə yanaşı, Suriya hökuməti, Suriya silahlı müxalifəti və BMT-nin nümayəndə heyətləri iştirak edir.