ABŞ Prezidenti Donald Tramp Ermənistanın Baş naziri Nikol Paşinyanı ölkədə keçirilən parlament seçkilərində hakim siyasi qüvvənin qələbəsi münasibətilə təbrik edib.

Tramp bu barədə yaydığı açıqlamada Paşinyanın yenidən seçilməsini dəstəklədiyini vurğulayıb və Ermənistanın gələcək inkişafı ilə bağlı nikbin fikirlər səsləndirib.

“Nikol Paşinyanı Ermənistanın milli seçkilərindəki böyük qələbəsi münasibətilə təbrik edirəm. Onu yenidən seçilməyə dəstəklədiyim üçün çox qürur duyuram və şübhə etmirəm ki, onun rəhbərliyi altında gözəl Ermənistan ölkəsi bütün gözləntilərdən daha böyük uğurlara və çiçəklənməyə nail olacaq”, – deyə ABŞ Prezidenti bildirib.

Donald Tramp qeyd edib ki, seçkilərin nəticələri Ermənistan üçün yeni imkanlar yaradır və ölkənin dövlət institutlarının daha da gücləndirilməsi, iqtisadi inkişafın sürətləndirilməsi baxımından mühüm əhəmiyyət daşıyır.

ABŞ liderinin sözlərinə görə, Ermənistan xalqının seçimi ölkənin gələcək siyasi kursunun müəyyənləşdirilməsi baxımından mühüm mərhələdir və Vaşinqton İrəvanla əməkdaşlığın inkişafında maraqlıdır.

Qeyd edək ki, iyunun 7-də Ermənistanda keçirilən parlament seçkilərində Baş nazir Nikol Paşinyanın rəhbərlik etdiyi hakim “Vətəndaş Müqaviləsi” Partiyası səslərin təxminən 49,8 faizini toplayaraq birinci olub. Müxalif qüvvələr seçkilərin nəticələrinə etiraz etsələr də, Mərkəzi Seçki Komissiyası ilkin nəticələrə əsasən hakim partiyanın qələbəsini təsdiqləyib.

Seçkilərin yekun nəticələrinin yaxın günlərdə rəsmi şəkildə elan olunacağı gözlənilir.