Ötən gecə Bakı-Quba yolunun Şabran rayonunun Gəndab kəndindən keçən hissəsində baş verən qəzada iki nəfər dünyasını dəyişib.

Daxili İşlər Nazirliyinin Baş İstintaq və Təhqiqat İdarəsinin yol-nəqliyyat hadisələrinə dair işlər üzrə istintaq və təhqiqat şöbəsindən əldə etdiyimiz məlumata görə, qəza zamanı Qubadan Bakı istiqamətinə gedən iki nəqliyyat vasitəsi toqquşub. Yüksək sürətlə gələn -Şabranın Gəndab kənd sakini Emin Sədrəddin oğlu İsmayılovun idarə etdiyi"Mersedes"markalı avtomaşın Qubanın İqriq kənd sakini, 27 yaşlı Xəyal Şahvələd oğlu Əhmədxanlının idarə etdiyi "Priora"markalı avtomobilə arxadan çırpılıb. Nəticədə "Priora"nın sürücüsü Xəyal Əhmədxanlı və sərnişini, 28 yaşlı Əli Ağadadaş oğlu Əzizov keçiniblər. Sürücünün qardaşı Əmir Əhmədxanlı və daha iki sərnişin və "Mersedes"in sürücüsü Emin İsmayılov da xəstəxanaya çatdırılıblar. Hamısının vəziyyətinin ağır olduğu deyilir. Qəza zamanı Emin İsmayılov "Mersedes"markalı avtomaşında tək olub."Priora"da isə 5 nəfərin olduğu deyilir.

Faktla bağlı DİN-in Baş İstintaq və Təhqiqat şöbəsində cinayət işi açılıb. Qəzaya "Mersedes"markalı avtomobilin yüksək sürətlə idarə olunması səbəbindən baş verdiyi bildirilir.