İranın İslam İnqilabı Keşikçiləri Korpusunun (SEPAH) Qüds Qüvvələri tərkibində fəaliyyət göstərən Fələstin Korpusunun komandiri Səid İzadi İsrailin həyata keçirdiyi hava hücumu nəticəsində məhv edilib.

Bu barədə İsrailin müdafiə naziri İsrail Katz rəsmi açıqlama yayıb. Onun sözlərinə görə, hücum İranın Qum şəhərində, İzadinin yaşadığı mənzilə endirilib. Katz hadisəni İsrail kəşfiyyatının və hava qüvvələrinin “böyük nailiyyəti” kimi dəyərləndirib.

“Bu əməliyyat ölənlər və girovlar üçün ədalətin bərpasıdır. İsrailin gücü və iradəsi bütün düşmənlərinə çatacaq,” – deyə müdafiə naziri bildirib.

İsrail tərəfi, hücumun dəqiq kəşfiyyat məlumatları əsasında həyata keçirildiyini və bölgədə İranın dəstəklədiyi qruplaşmaların fəaliyyətlərinə qarşı davamlı tədbirlərin görüləcəyini vurğulayıb.

Hazırda İran tərəfi rəsmi münasibət bildirməyib. Bununla belə, SEPAH-a yaxın mənbələrdə gərginliyin artacağı və cavab tədbirlərinin müzakirə olunduğu barədə məlumatlar yayılıb.

İzadi, SEPAH-ın Qüds Qüvvələri daxilində Fələstinlə bağlı əməliyyatlara cavabdeh əsas fiqurlardan biri sayılırdı. Onun ölümü bölgədə İran və İsrail arasında mövcud gərginliyin yeni mərhələyə keçəcəyinə dair narahatlıqları artırıb.