ABŞ və İsrailin hava zərbələrindən sonra uzun müddət ictimaiyyət qarşısına çıxmayan İranın ali dini lideri Ayətullah Əli Xamenei sükutunu pozub. O, İsraillə 12 gün davam edən hərbi qarşıdurmadan sonra ilk dəfə canlı şəkildə çıxış edərək, baş verənləri “İranın qələbəsi” kimi qiymətləndirib.

86 yaşlı liderin çıxışı iyunun 24-də əldə edilən atəşkəsin qüvvəyə minməsindən iki gün sonra yayımlanıb. O, öz bəyanatında ABŞ-ı “sərt şillə” ilə cəzalandırdıqlarını və İsrailin “İslam Respublikasının zərbələri altında məğlub olub çökmək üzrə olduğunu” bildirib.

Xameneinin sözlərinə görə, İsrailin gücü “şişirdilmiş mifdir” və bu qarşıdurma zamanı “bu mifin necə parçalandığı bir daha sübut olundu”. O, İran xalqını “qələbə” münasibətilə təbrik edib və “bu müqavimətin sionist rejimin tam süqutuna qədər davam edəcəyini” bəyan edib.

Qeyd edək ki, müharibə günlərində Xamenei yalnız iki videomüraciət göndərmişdi. İyunun 19-da yayımlanan ikinci müraciətin zəif səs və görüntü keyfiyyəti onun bunkerdə gizləndiyi ehtimalını doğurmuşdu. Sonuncu çıxış isə daha keyfiyyətli görüntü və səs müşayiəti ilə yayımlanıb.

Xatırladaq ki, iyunun 13-də başlayan və ABŞ-nin də qoşulduğu hərbi əməliyyatlar zamanı hər iki tərəf - İran və İsrail – qarşılıqlı raket və hava zərbələri endirmişdi. İranın nüvə obyektləri, ABŞ-nin Qətərdə yerləşən “Əl-Udeyd” bazası və İsrailin müxtəlif hərbi infrastruktur obyektləri bu zərbələrə tuş gəlmişdi.

Hazırda tərəflər arasında əldə edilmiş atəşkəs qüvvədədir, lakin tərəflərin hər biri münaqişəni qələbə kimi təqdim etməyə çalışır. Xameneinin bu çıxışı da daxili ictimaiyyəti səfərbər saxlamaq və İranın regiondakı təsir gücünü qorumağa yönəlik addım kimi qiymətləndirilir.