Rusiyanın Daxili İşlər Nazirliyi Ural bölgəsində yaşayan azərbaycanlı diaspor rəhbəri Şahin Şıxlinskini federal axtarışa verib. Bu barədə nazirliyin rəsmi məlumat bazasında qeyd olunub.

Məlumata görə, Şıxlinski Rusiya Cinayət Məcəlləsinin konkret bir maddəsi üzrə axtarılır, lakin ittihamın dəqiq mahiyyəti barədə ictimaiyyətə açıqlama verilməyib.

Qeyd edək ki, Şahin Şıxlinski iyulun 1-də Yekaterinburq şəhərində saxlanılmışdı. Bu hadisə iyunun 28-də Rusiya İstintaq Komitəsinin keçmiş qətl hadisələrinin istintaqı çərçivəsində həyata keçirdiyi genişmiqyaslı əməliyyatla əlaqələndirilir. Əməliyyat zamanı əsasən Azərbaycan əsilli şəxslərin hədəf alındığı, iki nəfərin öldüyü və bir neçə nəfərin saxlanıldığı bildirilir. Saxlanılanlar arasında Azərbaycan diasporunun üzvləri də olub.

İyulun 1-də Yekaterinburqda yerləşən “Baku Plaza” ticarət mərkəzi yaxınlığında “Mercedes-Benz G-class” markalı avtomobil xüsusi təyinatlı qüvvələr tərəfindən saxlanılıb. Avtomobildə Şahin Şıxlinski və onun oğlu olub. Onlar dindirilmək üçün aparılsa da, daha sonra sərbəst buraxılmışdılar.

Hazırda Şıxlinskinin hansı səbəblə yenidən axtarışa verildiyi rəsmi qurumlar tərəfindən açıqlanmayıb. Hadisə Rusiya ilə Azərbaycan arasında münasibətlərdə gərginliyin artdığı bir dövrə təsadüf edir.

Hadisə ilə bağlı həm Rusiya, həm də Azərbaycan tərəfi hələlik əlavə açıqlama verməyib.