Bir sıra regionlarda qurban bayramı günlərində heyvanların kəsimi və satışı üçün əlavə tədbirlər görüləcək.

Bu barədə Azərbaycan Qida Təhlükəsizliyi Agentliyinin (AQTA) şöbə müdiri, baş dövlət baytarlıq müfəttişi Qalib Əbdüləliyev məlumat verib.

Onun sözlərinə görə, bəzi bölgələrdə AQTA ilə razılaşdırılmış şəkildə səyyar heyvan kəsimi çadırları quraşdırılacaq. Bu çadırlar vasitəsilə qurbanlıq heyvanların baytarlıq nəzarəti altında kəsimi və satışı təşkil olunacaq.

Eyni zamanda, işğaldan azad edilmiş rayonlarda – Ağdam, Cəbrayıl, Füzuli və Laçında da qurbanlıq heyvanların kəsimi və satışı üçün xüsusi xidmətlər yaradılacaq.

Baş dövlət baytarlıq müfəttişi vətəndaşlara müraciət edərək bildirib ki, qurban kəsimi həm dini qaydalara, həm də qüvvədə olan qanunvericiliyin tələblərinə uyğun şəkildə həyata keçirilməlidir. O vurğulayıb ki, baytarlıq-sanitariya və gigiyena normalarına cavab verməyən yerlərdə – küçə, yol kənarı və digər ictimai ərazilərdə heyvan kəsimi və satışına yol verilmir.

Bundan əlavə, baytarlıq sənədləri olmadan heyvanların daşınmasının da qadağan olunduğu diqqətə çatdırılıb.