13 aprel tarixində keçirilmiş buraxılış imtahanlarının nəticələri açıqlanıb. Bu barədə Dövlət İmtahan Mərkəzi (DİM) məlumat yayıb.

DİM-in açıqlamasına əsasən, 9-cu sinif şagirdləri bu keçidə daxil olaraq iş nömrəsi və şəxsiyyəti təsdiq edən sənədin nömrəsi (və ya FİN kodu) vasitəsilə imtahan nəticələrini, cavab vərəqinin qrafik təsvirini və topladıqları balı öyrənə bilərlər.

Şagirdlər həmçinin mobil operatorlar (Azercell, Bakcell, Nar, Naxtel) vasitəsilə buraxılış vərəqəsində göstərilən kodu 7727 nömrəsinə göndərməklə də nəticələrini əldə edə bilərlər.

Onlayn yoxlama və üztanıma texnologiyası

Yazı işlərinin yoxlanılması tamamilə onlayn şəkildə həyata keçirilib. Markerlər evlərindən sistemə qoşularaq onlara proqram tərəfindən təsadüfi şəkildə göndərilən cavab vərəqlərini yoxlayıblar. Bu zaman üztanıma texnologiyasından istifadə olunub, yoxlama zamanı isə bir sıra beynəlxalq tələblər tətbiq edilib – o cümlədən sualların kalibrlənməsi və “seeding” prosesi.

Bu proqram təminatı DİM-in mütəxəssisləri tərəfindən hazırlanıb.

Statistika və qayda pozuntuları

İmtahanda iştirak etməli olan 51 237 nəfərdən 337 nəfər imtahana qatılmayıb. İmtahan zamanı qaydaları pozduğuna görə 6 nəfərin nəticəsi ləğv edilib.

Ən yüksək nəticə göstərən 8 nəfər maksimal olan 300 balı toplamaqla imtahanda fərqlənib.

Apellyasiya müraciətləri

İmtahan nəticələri ilə razılaşmayan şagirdlər 28 may saat 10:00-dan 30 may saat 17:00-dək apellyasiya.dim.gov.az saytında yerləşdirilən elektron ərizəni dolduraraq Apellyasiya Komissiyasına müraciət edə bilərlər. Ərizədə tapşırığın nömrəsi, müraciətin məzmunu və uyğun meyar bəndi dəqiq şəkildə qeyd olunmalıdır. Əks halda, müraciət qəbul edilməyəcək.

Müraciətlərə baxıldıqdan sonra şagirdlərə nəticə barədə SMS göndəriləcək, daha sonra isə həmin nəticələr elektron kabinetdən çap oluna biləcək.

DİM abituriyentlərə müraciət etməzdən əvvəl cavab vərəqini, cavablarını və qiymətləndirmə meyarlarını diqqətlə araşdırmağı tövsiyə edir. Ötən illərin təcrübəsi göstərib ki, apellyasiya üçün müraciət edənlərin təxminən 15%-i tapşırığa cavab vermədən şikayət edib. Bu kimi müraciətlərə baxılmayacaq.