Sentyabrın 29-da Bakı Apellyasiya Məhkəməsində “Meydan TV işi” üzrə həbsdə olan jurnalist Xəyalə Ağayevanın həbs müddətinin uzadılması ilə bağlı şikayətinə baxılıb. Prosesə hakim Zamin İbrahimov sədrlik edib.
Xəyalə Ağayeva 2024-cü il dekabrın 6-da saxlanılıb. Ona əvvəlcə Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb və barəsində həbs qətimkan tədbiri seçilib.
2025-ci il avqustun 28-də ittihamlar ağırlaşdırılıb və hazırda jurnalist CM-in 7 maddəsi üzrə məsuliyyətə cəlb olunur:
• 192.3.2 – qanunsuz sahibkarlıq (xüsusilə küllü miqdarda gəlir əldə etməklə),
• 193-1.3.1 – cinayət yolu ilə əldə edilmiş əmlakı leqallaşdırma,
• 193-1.3.2 – həmin əməlin xeyli miqdarda törədilməsi,
• 206.4 – mütəşəkkil dəstə tərəfindən qaçaqmalçılıq,
• 213.2.1 – vergidən yayınma (mütəşəkkil dəstə tərəfindən),
• 320.1 – sənəd saxtalaşdırma,
• 320.2 – saxta sənədlərdən istifadə etmə.