Azərbaycanda 4 bankın lisenziyasının geri alınması təkcə bu banklardakı maliyyə problemlərini üzə çıxarmayıb. Baş verənlər həm də bank sektorunda nəzarətin, intizamın və əmanətlərlə bağlı fırıldaqların hansı səviyyədə olduğunu göstərib.

FED.az xəbər verir ki, bankların bağlanmasından keçən qısa müddət ərzində burada əmanətlərlə bağlı çoxsaylı aldadılma, müştərilərin etibarından və qanunvericiliyin incəliklərindən məlumatlı olmamasından sui istifadə halları aşkar edilib.
«Atabank», «Amrahbank» və «NBC Bank»dan sonra «AG Bank» əmanətçiləri də probleml üzləşdiklərini bildiriblər.

Bankın əmanətçisi Rəsmiyyə Qasımova FED.az-a bildirib ki, o və qızı banka əmanəti 2015-ci ildə yatırıblar. 2015-ci ildə 25 min dollar yatırmışdıq, sonra çıxardıq, 2015-ci ildə 6 min dollar qaldı, sonradan elə həmin il qızım 5 min dollar yatırdı, mən də əmanətimi artıraraq 15 min dollara çatdırdım. Faktiki olaraq həmin ildən bəri bizim əmanəttimizin həcmi dəyişməyib, mənim adıma 15 min dollar, qızımda isə 5 min dollar əmanət olub, üstünə heç nə əlavə etməmişik, sadəcə hər il müqaviləni yeniləmişik.

«AG Bank» bağlananda yaxınlaşdıq, bizə dedilər ki, mənim 15 min dollarlıq əmanətin qarşısında mənə 6070 dollar, qızıma isə 5 min dollar əmanət qarşısında cəmi 212 manat ödəniləcək». R.Qasımova bu məbləğlərlə razılaşmayaraq Əmanətlərin Sığortalanması Fonduna müraciət edib: «Bizə bildirdilər ki, 2017-ci ildən sonra «AG Bank»a əmanət qəbul etmək qadağan edilib. Amma bizim əmanət 2017-ci ildən deyil, 2015-ci ildən yatırılmışdı».

Əmanətçi bildirir ki, 2016-cı ildən bəri müqaviləsini hər il yeniləyib, bununla bağlı qeydə əsasən, müştəri banka getməsə də, müqavilə uzadılacaqdı.

Digər əmanətçisi Elçin Məmmədov isə «AG Bank»a əmanət qadağasından düz bir il sonra əmanət yerləşdirib. Belə ki, bankın əmanət qəbul etməsi hələ 2017-ci ildə qadağan edilsə də, E.Məmmədovun əmanəti banka 2018-də yatırılıb: «2018-ci ildə banka iki fərqli hesabla 2 əmanət yerləşdirmişik - 30 min manat və 10 min manat, iyunun 4-də və iyul ayında». Bir il sonra əmanət müqavilələri yenilənib. Əmanətçi FED.az-a bildirib ki, bank bağlananda müraciət edib və ona əmanətinin blokda olduğu bildirilib.

Amma bankdan yenə də təkid edilib ki, onun əmanəti sığortalıdır: «Bankın nümayəndələri mənə bildirdilər ki, əmanətim sığortalıdır. Dedilər ki, əmanətlə bağlı hər il Əmanətlərin Sığortalanması Fonduna təqvim haqları da ödənilib və onun sənədləri də var. Bankdan dedilər ki, əgər banka əmanət qadağasın qoyulmuşdusa, niyə Fond bizdən bu pulları tələb edib alırdı?».

Əmanətçi bildirir ki, yaranan vəziyyətdə Mərkəzi Bankın və Fondun da günahı var. «Gərək elan edirdilər ki, bu banklarla əmanət qəbulu qadağan edilib, biz də bilərdik, pulumuzu ora yerləşdirməzdik».