Dünyada koronavirus infeksiyasına qarşı mübarizə çərçivəsində artıq bir sıra ölkələrdə vaksinasiyaya başlanılıb. Azərbaycan koronavirusa qarşı peyvənd tədarükü üçün müqavilələr imzalayıb və ilk partiyaların yanvarda çatdırılması gözlənilir.

Baxmayaraq ki, günümüzdə peyvəndedilmə mövcud epidemioloji vəziyyətdən yeganə çıxış yolu hesab edilir, bəzi vətəndaşlar, yumşaq desək, COVID-19 peyvəndini xoş qarşılamırlar. Bəziləri ümumiyyətlə bunun demək olar ki, bütün bəşəriyyətin ölümünə səbəb ola biləcəyinə əmindirlər.

Media.Az bu barədə Səhiyyə Nazirliyinin baş infeksionisti Təyyar Eyvazovla söhbətləşib.

- Koronavirus son vaxtlar sürətlə mutasiya edir. Bu vəziyyətdə yaradılan peyvəndlər təsirli sayıla bilərmi?

- Pandemiya zamanı mutasiyalar qaçılmazdır. Buna görə də alimlər əhəmiyyətli mutasiyaların qarşısını almaq üçün ən qısa müddətdə əhalinin kütləvi peyvənd edilməli olduğu qənaətinə gəliblər. Bu yolla epidemiya zəncirinin qırılması mümkün olacaq ki, bu da kollektiv immunitetin inkişafına və yoluxmuşların sayının minimuma endirilməsinə gətirib çıxaracaq.

- Ancaq çox insan peyvənddən qorxur, peyvənd nə qədər təhlükəsizdir?

- Yeni peyvəndlərin təhlükəsizliyi üç mərhələli klinik sınaqda qiymətləndirilir. Üçüncü test mərhələsinin ilkin nəticələrinə görə, təsdiq olunmuş peyvəndlərin kifayət qədər təhlükəsizliyi məlum olub. Bundan əlavə, kütləvi peyvəndləmə dövründə təhlükəsizlik məsələsi diqqət mərkəzində olacaq, hər bir fərdi hal diqqətlə araşdırılacaq.

- Peyvəndin əks göstərişləri və mümkün riskləri barədə qısa məlumat verərdiniz.

- Peyvənd zamanı yüngül lokal və ümumi reaksiyalar ola bilər. Birincisi, inyeksiya yerində mümkün ağrı, qızartı, şişkinlikdir. Ümumi reaksiyalar- hərarət, halsızlıq, zəiflik, əzələ ağrısı və sairdir. Heç biri həyati təhlükə yaratmır və çox tez keçir.

Ən təhlükəlisi isə peyvəndə və onun tərkib hissələrinə mümkün allergik (anafilaktik) reaksiya ola bilər. Ancaq bu, çox nadir hallarda olur. Bu baş verərsə, peyvənd edən tibbi heyət dərhal ilk tibbi yardımı göstərəcək.