ABŞ-da yaşayan siyasi şərhçi Ərəstun Oruclu və Fransada yaşayan tarixçi Altay Göyüşov barəsində aparılan cinayət işləri üzrə ibtidai istintaq başa çatıb. Bu barədə məlumat Baş Prokurorluğun müraciəti əsasında ictimaiyyətə təqdim olunub.

Baş Prokurorluğun açıqlamasına görə, Ərəstun Orucluya dekabrın 9-dan, Altay Göyüşova isə dekabrın 10-dan etibarən cinayət işinin materialları ilə tanış olmaq üçün Baş Prokurorluğun İstintaq İdarəsində məhdudiyyətsiz şəkildə şərait yaradılacaq.

Qurum bildirib ki, adıçəkilən şəxslər istintaqa gəlmədiyi təqdirdə, iş materialları qiyabi icraat qaydasında məhkəməyə göndərilə və onların barəsində qiyabi hökm çıxarıla bilər.

Hər iki şəxs Cinayət Məcəlləsinin 281.2-ci maddəsi — “dövlət əleyhinə yönəlmiş açıq çağırışlar (təkrar və ya bir qrup şəxs tərəfindən törədildikdə)” ittihamı ilə təqsirləndirilir.

İstintaq materiallarında bildirilir ki, onlar müxtəlif “YouTube” kanallarında Azərbaycanda “qanuni əsaslarla formalaşmış hakimiyyətə qarşı zor tətbiqinə çağırışlar ediblər”.

Ərəstun Oruclu və Altay Göyüşov isə ittihamları tamamilə əsassız adlandırır, öz fəaliyyətlərini ifadə azadlığı çərçivəsində apardıqlarını bildirirlər.

Qeyd edək ki, hər iki şəxs barəsində cinayət işi bu ilin fevralında açılıb, lakin Baş Prokurorluq məlumatı yalnız noyabrda ictimaiyyətə açıqlayıb.