Rusiya Müdafiə Nazirliyi Qərb ölkələrini “yeni böyük Avropa müharibəsinə hazırlaşmaqda” ittiham edib.

Bu barədə Rusiya müdafiə nazirinin müavini, Silahlı Qüvvələrin Baş Hərbi-Siyasi İdarəsinin rəisi, ordu generalı Viktor Qoremıkin Minskdə keçirilən beynəlxalq tədbirdə çıxışı zamanı bildirib.

Onun sözlərinə görə, NATO üzvü olan bir sıra Avropa ölkələri Ukraynadakı müharibənin danışıqlar yolu ilə həllinə mane olur və ABŞ administrasiyasını sülh danışıqlarından uzaq tutmağa çalışır.

Qoremıkin iddia edib ki, Qərb artıq “yeni böyük Avropa müharibəsinə hazırlığını gizlətmir”. O, Ukraynada müharibənin uzanmasına görə də Qərb dövlətlərini günahlandırıb.

Rusiya rəsmisinin fikrincə, mövcud vəziyyət “Avroatlantik təhlükəsizlik modelinin tam iflası” ilə nəticələnib.

Bundan əvvəl Rusiya xarici işlər nazirinin müavini Aleksandr Qruşko da NATO və Avropa İttifaqının 2030-cu il ərəfəsində Rusiya ilə mümkün hərbi qarşıdurmaya hazırlaşdığını iddia etmişdi.

Rusiya xarici işlər naziri Sergey Lavrov isə Avropa ölkələrinin Rusiya ilə mümkün qarşıdurmaya hazırlaşmaq üçün vaxt qazanmağa çalışdığını bildirmişdi.

Qərb ölkələri isə Rusiyanın bu cür ittihamlarını rədd edir və Ukraynaya hərbi-siyasi dəstəyi Rusiyanın təcavüzünə qarşı müdafiə məqsədli addım kimi izah edirlər.