Avropa Şurası Parlament Assambleyasının (AŞPA) məruzəçisi, belçikalı deputat Kristof Lakrua “Abzas Media işi”ndə yeddi jurnalist barəsində çıxarılan uzunmüddətli həbs cəzalarının qüvvədə saxlanılmasından narahatlığını ifadə edib.

“Azərbaycanda jurnalistlərin və insan haqları müdafiəçilərinin həyatına və təhlükəsizliyinə təhdidlər” mövzusu üzrə məruzəçi olan Lakrua sentyabrın 12-də yaydığı bəyanatda qeyd edib ki, bu qərar söz azadlığı və jurnalistlərin təhlükəsizliyi ilə bağlı vəziyyətin daha da pisləşməsindən xəbər verir.

Deputat bildirib ki, müstəqil jurnalistlərin həbsi və sərt məhkəmə hökmü Azərbaycanda media azadlığının vəziyyətinə dair ciddi suallar doğurur. O, hakimiyyəti beynəlxalq öhdəliklərinə sadiq qalmağa və jurnalistlərə qarşı təzyiqlərə son qoymağa çağırıb.

Xatırladaq ki, “Abzas Media işi” çərçivəsində saxlanılan jurnalistlər ötən dövrdə müxtəlif müddətli həbs cəzalarına məhkum ediliblər. Onların tərəfdarları ittihamların siyasi sifarişli olduğunu bildirirlər.