ATƏT çərçivəsində Vyana şəhərində keçirilən beynəlxalq toplantıda Azərbaycandakı media mühiti müzakirə olunub.

Xəbər verdiyimiz kimi 11–12 may 2026-cı il tarixlərində ATƏT-in təşkilatçılığı ilə Vyanada “Supplementary Human Dimension Meeting – Safeguarding Civic Space in the Digital Age” (“Rəqəmsal dövrdə vətəndaş cəmiyyətinin fəaliyyət imkanlarının qorunması”) adlı beynəlxalq tədbir keçirilib. İki gün davam edən müzakirələrdə rəqəmsal dövrdə vətəndaş cəmiyyətinin fəaliyyəti, ifadə azadlığı, media hüquqları və insan haqlarının qorunması əsas mövzular olub.

Tədbirdə çıxış edən beynəlxalq ekspertlər və hüquq müdafiəçiləri müxtəlif ölkələrdə vətəndaş cəmiyyətinə qarşı artan rəqəmsal təzyiqlərdən danışıblar. Müzakirələr zamanı Azərbaycanda media azadlığı və jurnalistlərin vəziyyəti də diqqət mərkəzində olub.

Toplantıda iştirak edən azərbaycanlı jurnalist Leyla Mustafayeva çıxışında Abzas Media və Meydan TV əməkdaşlarının həbslərinə diqqət çəkib. O, jurnalistlər Ülvi Həsənli, Sevinc Vaqifqızı və Akif Qurbanov daxil olmaqla bir sıra media nümayəndələrinin peşə fəaliyyətlərinə görə həbs edildiyini bildirib.

Çıxış zamanı həmçinin Meydan TV və Azadlıq Radiosu fəaliyyətinin məhdudlaşdırılması, müstəqil saytların bloklanması və sosial şəbəkələrdə paylaşımlara görə vətəndaşların təqib olunması ilə bağlı iddialar səsləndirilib. Bildirilib ki, təzyiqlər təkcə jurnalistləri deyil, sosial mediada hakimiyyəti tənqid edən şəxsləri də əhatə edir.

Azərbaycanın ATƏT yanında daimi nümayəndəliyi isə səsləndirilən iddiaları qəbul olunmaz adlandırıb və ölkədə media azadlığının təmin olunduğunu iştirakçıların diqqətinə çatdırıb.

Toplantıda jurnalistlərin rəqəmsal təhlükəsizliyi, onlayn təzyiqlər, dezinformasiya, azsaylı xalqlara qarşı təzyiqlər, qadın haqları və vətəndaş cəmiyyətinin müdafiəsi kimi məsələlər də geniş şəkildə müzakirə olunub.