Bakıda Dövlət Miqrasiya Xidmətinin əməkdaşlarının iştirakı ilə gecə saatlarında baş verən ağır yol-nəqliyyat hadisəsində bir neçə nəfər xəsarət alıb. Qəza Sabunçu rayonu ərazisində, Dövlət Miqrasiya Xidmətinin mayoru Səbinə Rzayevanın idarə etdiyi avtomobilin qarşıdan gələn nəqliyyat vasitəsi ilə toqquşması nəticəsində baş verib.

Hadisə zamanı xidməti avtomobildə olan digər əməkdaşlar da müxtəlif dərəcəli bədən xəsarətləri alıblar. Qarşı tərəfin sürücüsü isə çoxsaylı sınıq xəsarətləri ilə xəstəxanaya yerləşdirilib. Yaralıların vəziyyəti barədə hələlik rəsmi açıqlama verilməyib.

İlkin məlumatlara görə, qəzanın səbəbi Səbinə Rzayevanın yol hərəkəti qaydalarını pozması olub. Hadisə şahidlərinin iddialarına əsasən, qadın mayor qəza zamanı avtomobili içkili vəziyyətdə idarə edib.

Qeyd edək ki, Səbinə Rzayeva həm də idmançı kimi tanınır – o, ağırlıqqaldırma üzrə beynəlxalq dərəcəli hakimdir.

Hazırda hadisə ilə bağlı araşdırma aparılır. Rəsmi qurumlardan insidentlə bağlı açıqlama verilməyib.