İsrailin İrana hücumu ilə əlaqədar olaraq İran hava məkanının bağlanması nəticəsində bir sıra beynəlxalq reyslər marşrutlarını dəyişmək məcburiyyətində qalıb. Yerli KİV-lərin yaydığı məlumata görə, Dubaya uçan və göyərtəsində azərbaycanlı sərnişinlərin də olduğu bildirilən bir təyyarə Ermənistanın paytaxtı İrəvanda yerləşən Zvartnots beynəlxalq hava limanına eniş edib.

Məlumatı erməni mətbuatı yayıb. Bildirilib ki, eniş gecə saat 04:30 radələrində baş verib. Ermənistan Mülki Aviasiya Komitəsinin mətbuat katibi Lilit Ağabeklyan jurnalistlərə açıqlamasında həmin vaxt ərzində İrəvana ümumilikdə üç reysin eniş etdiyini təsdiqləyib: Minvodı–Dubay, Kazan–Şarja və Belqrad–Dubay istiqamətində olan reyslər.

Katib, eniş edən təyyarələrin hansı ölkə vətəndaşlarını daşıdığına dair əlavə məlumat verməyib və azərbaycanlı sərnişinlərin olub-olmaması ilə bağlı yayılan xəbərləri şərh etməkdən imtina edib.

Qeyd edək ki, İsrail və İran arasında son günlərdə baş verən hərbi-siyasi gərginlik regional hava nəqliyyatında ciddi pozuntulara səbəb olub.