İyulun 20-nə keçən gecə Bakıdan Naxçıvana gedən üç sərnişin avtobusu İran gömrük-keçid məntəqəsini keçdikdən dərhal sonra saxlanılıb. Avtobuslarda olan 50-yə yaxın sərnişin yaxınlıqdakı bir məscidə yerləşdirilib və onlara ərazidən bir kilometrdən artıq uzaqlaşmaq qadağan olunub.

Hadisə barədə məlumatı sərnişinlər “Gündəlik Naxçıvan”a veriblər. Onların sözlərinə görə, İran tərəfi avtobusların saxlanıldığını ictimailəşdirməməyi tələb edir və sərnişinləri təhdid edir. Sərnişinlərə nə geri qayıtmaq, nə də digər nəqliyyat vasitəsi ilə Culfa gömrüyünə getmək icazəsi verilir.

Sərnişinlər aclıq və susuzluqdan şikayətçidir

Adının çəkilməsini istəməyən sərnişinlərdən biri bildirib ki, məscidə yerləşdirilən insanlara nə yemək, nə də su verilir:

“Əgər buraxmayacaqdılarsa, niyə bizi sərhədi keçməyə qoydular? İndi burda bizi girov kimi saxlayıblar. Nə Biləsuvara qayıda bilirik, nə də Culfa gömrüyünə gedə bilirik. Deyirlər ki, burdan uzaqlaşsanız, həbs olunacaqsınız. Bəzi sərnişinlərin üzərində pul da yoxdur. 40 nəfəri məscidə yığıblar, isti, havasızlıq… nəfəs almaq belə çətindir.”

İran: “Azərbaycan hökuməti icazə üçün Tehrana məktub yazmalıdır”

Sərnişinlərin bildirdiyinə görə, İran tərəfi avtobusların hərəkətə davam etməsi üçün Azərbaycan hökumətinin Tehrana rəsmi məktub göndərməli olduğunu deyib. Bu sənəd olmadan onların buraxılmayacağı bildirilib.

Avtobus reysləri yeni bərpa olunmuşdu

İran ərazisindən keçməklə Bakı ilə Naxçıvan arasında sərnişin avtobuslarının hərəkəti uzun illərdir ki, fəaliyyət göstərir. Lakin İsraillə İran arasında artan gərginlik səbəbilə bu reyslər təhlükəsizlik məqsədilə dayandırılmışdı. Azərbaycan tərəfi iyulun 19-da bu reyslərin yenidən bərpa edildiyini elan etmişdi.

Hazırda saxlanılan sərnişinlərin vəziyyəti və Azərbaycan hökumətinin bu məsələyə rəsmi münasibəti barədə ictimaiyyətə heç bir açıqlama verilməyib. Sərnişinlər isə mümkün qədər tez ölkələrinə qayıtmaq və təhlükəsizliklərinin təmin olunmasını tələb edirlər.