Rusiyanın paytaxtı Moskvada yerləşən Vnukovo hava limanından Gəncə şəhərinə uçmalı olan reys təxminən 25 saatdır ki, yubanır və nəhayət ləğv edilib.

Bu barədə Baku.ws-ə həmin reyslə Azərbaycana gəlməli olan sərnişinlərdən biri məlumat verib. Onun sözlərinə görə, “Utair” aviaşirkətinə məxsus təyyarə ötən gün saat 05:40-da havaya qalxmalı idi. Lakin uçuş əvvəlcə təxminən 20 saata yaxın gecikdirilib, daha sonra isə tamamilə ləğv olunub.

Sərnişinlər hazırda Vnukovo hava limanında gözləyirlər. Onların sözlərinə görə, nə aviaşirkət, nə də hava limanı rəhbərliyi tərəfindən dəqiq və rəsmi izahat verilmir:

“Bizə deyirlər ki, Gəncə sizi qəbul etmir. Amma bu, yalan xəbərdir. Gəncə hava limanı ilə əlaqə saxladıq, oradan bildirildi ki, heç bir problem yoxdur. Əslində, Moskva tərəfi bizi buraxmır. İndi isə deyirlər ki, guya təyyarədə texniki problem var. Burada bizə çox pis münasibət göstərirlər, heç kim suallarımıza cavab vermir,” – deyə sərnişin bildirib.

Hazırda reysin taleyi ilə bağlı rəsmilərdən rəsmi açıqlama yoxdur.