Fövqəladə Hallar Nazirliyinin (FHN) “112” qaynar xəttinə Bakı şəhərinin Yasamal rayonu ərazisində yerləşən çoxmərtəbəli yaşayış binasında yanğın baş verməsi barədə məlumat daxil olub. Bu barədə qurumun Mətbuat Xidməti məlumat yayıb.

Məlumata əsasən, hadisə yerinə dərhal FHN-in Dövlət Yanğından Mühafizə və Xüsusi Riskli Xilasetmə xidmətlərinin qüvvələri cəlb olunub.

Yanğınsöndürənlərin çevik müdaxiləsi nəticəsində onaltımərtəbəli binanın doqquzuncu mərtəbəsində yerləşən mənzildə başlayan yanğın digər mənzillərə keçməsinə imkan verilmədən qısa müddətdə söndürülüb.

Hadisə nəticəsində ümumi sahəsi 50 m² olan ikiotaqlı mənzilin yanar konstruksiyaları, onuncu mərtəbədəki mənzilin eyvanında kombi aparatının boruları və 1 m² sahədə məişət tullantıları, eləcə də on birinci mərtəbədəki mənzilin eyvanında 1 m² sahədə məişət tullantıları yanıb.

Digər mənzillər yanğından mühafizə olunub. Təhlükəsizlik məqsədilə 25 nəfər bina sakini təxliyə edilib. Xəsarət alan olmayıb.