Tanınmış vəkil Bəhruz Bayramovun mənzili qarət edilib. Hadisə Bakının Binəqədi rayonu, Rəsulzadə qəsəbəsində yerləşən həyət evində baş verib.

Vəkilin sözlərinə görə, evə daxil olan naməlum şəxslər bir çox əşyaları aparıblar:

“Televizor, xalçalar, kombi, qab-qacaqlar, bahalı suvenirlər və digər məişət əşyaları oğurlanıb. Mənə ən çox təsir edən mərhum anamın yadigarı olan qədimi xalça idi.”

Bayramov bildirib ki, hadisə yerinə dərhal polis əməkdaşları çağırılıb:

“İki saata yaxın araşdırma apardılar. Ekspertlər izləri götürdülər, istintaq hərəkətləri aparıldı. İnanıram ki, polis bu cinayətin üstünü açacaq.”

Daxili İşlər Nazirliyinin Mətbuat Xidmətinin əməkdaşı Elbrus İbrahimov məsələ ilə bağlı açıqlama verib. O, bildirib ki, faktla bağlı araşdırma aparılır və nəticələr barədə ictimaiyyətə əlavə məlumat veriləcək.

Hazırda hadisə ilə bağlı Binəqədi Rayon Polis İdarəsində istintaqın davam etdiyi bildirilir.