“Bakı Metropoliteni” QSC-nin bir sıra əməkdaşları maaşlarının aylarla gecikməsindən və Prezidentin yanvar ayında imzaladığı sərəncamla nəzərdə tutulan artımların hələ də tətbiq olunmamasından narazılıq ediblər.

İşçilərin sözlərinə görə, rəhbərlik maaş artımlarının veriləcəyini desə də, il bitmək üzrədir və ödənişlər hələ də həyata keçirilməyib.

Məsələ ilə bağlı “Bakı Metropoliteni” QSC-nin İctimaiyyətlə Əlaqələr şöbəsi açıqlama verib. Qurumdan bildirilib ki, əməkhaqqı ödənişləri əmək müqavilələrinin şərtlərinə və Azərbaycan Respublikasının əmək qanunvericiliyinə uyğun şəkildə təmin olunur:

“Bakı Metropoliteni” QSC tərəfindən cari ilin 1 yanvar tarixindən etibarən müvafiq tədbirlər həyata keçirilmiş, minimum əməkhaqqında edilən dəyişikliklər qanunvericiliyin tələblərinə uyğun olaraq əməkdaşların əməkhaqqına tətbiq edilmişdir. Hazırda Bakı Metropolitenində əmək haqqı qanunvericiliyin tələblərinə tam uyğundur və qurumun ödənilməmiş əmək haqqı öhdəliyi yoxdur”.

Qurum həmçinin bildirib ki, əməkhaqqı artımları təsdiqlənmiş büdcə, gəlir və xərclər nəzərə alınmaqla, korporativ idarəetmə prinsipləri çərçivəsində qəbul edilən qərarlara əsasən həyata keçirilə bilər.

Xatırladaq ki, Prezidentin 2025-ci ilin yanvar ayında imzaladığı sərəncama əsasən, bir sıra dövlət müəssisələrində, o cümlədən Bakı Metropolitenində əməkhaqqı artımı nəzərdə tutulmuşdu.