USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Klinikada iynə vurulan 72 yaşlı qadın öldü — TƏBİB hadisənin təfərrüatlarını açıqladı
Sumqayıtda 72 yaşlı qadın tibbi prosedur zamanı dünyasını dəyişib.
TƏBİB-in sorğusuna cavab olaraq verdiyi məlumata görə, hadisə noyabrın 25-də saat 10:30 radələrində Sumqayıt Tibb Mərkəzinin tabeliyində olan 3 nömrəli Ailə Sağlamlıq Mərkəzində qeydə alınıb. 1953-cü il təvəllüdlü qadın yüksək təzyiq şikayəti ilə tibb müəssisəsinə müraciət edib və həkim təyinatı əsasında ona “Aktoseril” preparatının inyeksiyası vurulub.
İnyeksiya zamanı xəstənin vəziyyəti qəfil pisləşib, sürətlə inkişaf edən anafilaktik şok baş verib. Tibbi personal bütün klinik protokollara uyğun olaraq dərhal reanimasiya tədbirlərinə başlayıb.
Buna baxmayaraq, həkimlərin səylərinə rəğmən xəstənin həyatını xilas etmək mümkün olmayıb və saat 11:30 radələrində bioloji ölüm qeydə alınıb.
Meyit Məhkəmə-Tibbi Ekspertiza və Patoloji Anatomiya Birliyinin Sumqayıt şəhər şöbəsinə göndərilib.
TƏBİB bildirib ki, prosedur həkim təyinatı və elektron qeydiyyat əsasında, preparatın seriya nömrəsi və yararlılıq müddəti yoxlanıldıqdan sonra, sertifikatlı tibb bacısı tərəfindən icra edilib. İnjeksiya otağının anafilaktik şok zamanı tələb olunan dərman və avadanlıqla tam təchiz olunduğu qeyd edilib.
Qurumun açıqlamasına görə, hadisə baş verən anda tibbi heyət tərəfindən bütün tələb olunan təcili yardım protokolları vaxtında və düzgün şəkildə tətbiq olunub.
