Dövlət Gömrük Komitəsinin Biləsuvar Gömrük İdarəsinin vəzifəli şəxsləri və qaçaqmalçılıqla məşğul olan digər şəxslərin qanunsuz əməlləri ilə bağlı Baş Prokurorluq yanında Korrupsiyaya qarşı Mübarizə Baş İdarəsində aparılan ibtidai istintaq tamamlanıb.

İstintaq zamanı müəyyən edilib ki, Biləsuvar Gömrük İdarəsinin Rəsmiləşdirmə Mərkəzinin inspektorları Vüsal Hüseynov, Kərim Kərimov, İsmayıl Məmmədalıyev və idarəyə təhkim olunmuş “Azərterminalkompleks” Birliyinin instruktor-kinoloqu Asif Hacımuradov Azərbaycan və İran vətəndaşları ilə cinayət əlaqəsinə girərək, rüşvət müqabilində qanunsuz şəkildə malların ölkə ərazisinə keçirilməsinə şərait yaradıb.

Həmin şəxslər İran İslam Respublikasında əldə edilmiş sərnişin avtobusunun yük yerində saxlanan, ümumilikdə 410 min manat dəyərində güclü təsir edən və psixotrop maddələr, habelə aksiz markası olmayan tütün məmulatlarının gömrük nəzarətindən kənar gətirilməsini təmin ediblər.

Toplanmış sübutlar əsasında:
• Vüsal Hüseynov, İsmayıl Məmmədalıyev, Kərim Kərimov və Asif Hacımuradova mütəşəkkil dəstə halında külli miqdarda dərman vasitələrinin və psixotrop maddələrin qanunsuz dövriyyəsi, qaçaqmalçılıq, aksiz markasız malların qanunsuz dövriyyəsi, rüşvət alma maddələri ilə ittiham elan edilib;
• Etibar Hatəmliyə müvafiq maddələr üzrə ittiham verilib;
• Jafar Rezayana isə həm dərman, həm psixotrop və güclü təsir edən maddələrin qanunsuz dövriyyəsi, həm də qaçaqmalçılıq və rüşvət maddələri üzrə ittiham irəli sürülüb.

Vüsal Hüseynov, İsmayıl Məmmədalıyev, Kərim Kərimov, Asif Hacımuradov və Etibar Hatəmli barəsində həbs qətimkan tədbiri, Jafar Rezayan barəsində isə digər qətimkan tədbiri seçilib.

Cinayət işi Bakı Ağır Cinayətlər Məhkəməsinə baxılması üçün göndərilib.