Rusiyanın Azərbaycandakı fövqəladə və səlahiyyətli səfiri Mixail Yevdokimov avqustun 18-də Azərbaycan Xarici İşlər Nazirliyinə çağırılıb.

XİN-in məlumatına görə, görüş zamanı son dövrlərdə Rusiyanın informasiya məkanında Azərbaycan, Azərbaycan xalqı və ölkə rəhbərliyi əleyhinə səsləndirilən təxribat, təhqir və təhdid xarakterli açıqlamalarla bağlı ciddi narahatlıq ifadə olunub və Rusiya tərəfinə qəti etiraz bildirilib.

Nazirlik xüsusilə Azərbaycanın daxili siyasi proseslərinə mümkün müdaxilənin müzakirə edilməsini, ölkə xalqına və rəhbərliyinə qarşı fiziki zorakılıq çağırışlarının səsləndirilməsini qəbuledilməz adlandırıb.

Rusiya tərəfinə ölkənin informasiya və media məkanında Azərbaycan əleyhinə təxribat, təhdid və zorakılıq ritorikasının qarşısının alınması üçün təxirəsalınmaz və təsirli tədbirlərin görülməsinin gözlənildiyi çatdırılıb.

Hadisə Azərbaycan Baş Prokurorluğunun bir gün əvvəl üç Rusiya vətəndaşı barədə cinayət işi başlatmasından sonra baş verib. Avqustun 17-də “Moskva 24” telekanalının aparıcısı İvan Knyazev, media eksperti Semyon Uralov və jurnalist, Rusiya nəqliyyat nazirinin müşaviri Aleksey Çadayev barəsində həbs qətimkan tədbiri seçildiyi və onların beynəlxalq axtarışa verildiyi açıqlanıb.

Baş Prokurorluq həmin şəxslərin “Чистота понимания” verilişində Azərbaycanın konstitusiya quruluşunun zorla dəyişdirilməsi, ərazi bütövlüyünün parçalanması, milli nifrət və düşmənçiliyin salınması, eləcə də terrorçuluğa çağırışlarla bağlı əməllərdə şübhəli bilindiyini açıqlayıb.

Bakı-Moskva münasibətlərində gərginlik

Son dövrdə Azərbaycan-Rusiya münasibətlərində bir sıra hadisələr fonunda gərginlik müşahidə olunur. 2024-cü ilin dekabrında AZAL təyyarəsinin Aktau yaxınlığında qəzaya uğraması, daha sonra Rusiyada azərbaycanlıların saxlanılması və Yekaterinburqda iki azərbaycanlının polis əməliyyatı zamanı ölməsi münasibətlərdə narazılığı artırıb.

Bunun ardınca Bakıda “Sputnik Azərbaycan”ın ofisində çalışan Rusiya vətəndaşları saxlanılıb. Azərbaycan hüquq-mühafizə orqanları həmin şəxslərlə bağlı araşdırmalar aparıldığını açıqlayıb.

Avqustun 17-də isə Moskvadakı Azərbaycan Milli-Mədəni Muxtariyyətinin sədri Bəxtiyar Həsənovun Rusiyadan deportasiya edildiyi bildirilib.

Hələlik Rusiya səfirliyi və digər rəsmi qurumlar Azərbaycan XİN-in səfir Yevdokimovla görüşdə səsləndirdiyi etirazlara açıq münasibət bildirməyiblər.