USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Ülvi Həsənli aclıq aksiyasını dayandırdı
Həbsdə olan AbzasMedia direktoru Ülvi Həsənli iyulun 10-dan başladığı aclıq aksiyasını dayandırıb. Bu barədə məlumatı onun yaxınları yayıb. Bildirilib ki, Həsənli ailəsinin və yaxınlarının sağlamlığı ilə bağlı narahatlıqlarını nəzərə alaraq aclığı dayandırmaq qərarı verib.
Aksiyanın dayandırılmasına səbəb kimi həmçinin “AbzasMedia işi” üzrə Apellyasiya Məhkəməsinin tarixinin müəyyənləşdirilməsi göstərilir. Məhkəmə prosesi avqustun 12-nə təyin olunub.
Ülvi Həsənli 17 gün davam edən aclıq aksiyası nəticəsində 15 kiloqram çəki itirib və hal-hazırda çəkisi 63 kiloqramdır. Ailəsinin verdiyi məlumata görə, o, aclığa görə cəza kamerasına – karsa salınıb. Şəraitin dözülməzliyi, havalandırmanın olmaması, isti hava səbəbilə Ülvinin səhhətində ciddi problemlər yaranıb. Nəfəs darlığı, ürək döyüntülərinin şiddətlənməsi, qan dövranının zəifləməsi, böyrəklərdə ağrılar və təzyiqin aşağı düşməsi müşahidə olunub. Onun həyat yoldaşı qeyd edib ki, Ülvinin həyatı üçün heç bir tibbi nəzarət təmin olunmayıb.
Aclıq aksiyasına Ülvi Həsənli ilə yanaşı, AbzasMedia baş redaktoru Sevinc Vaqifqızı və əməkdaşlar – Nərgiz Absalamova və Elnarə Qasımova da başlamışdı. Onlar iyulun 28-də – aksiyanın 7-ci günündə ailə üzvlərinin səhhətində yaranmış problemlərlə əlaqədar aclığı dayandırdıqlarını açıqlamışdılar.
Xatırladaq ki, 2025-ci il iyunun 20-də Bakı Ağır Cinayətlər Məhkəməsinin hökmü ilə AbzasMedia rəhbərliyi və əməkdaşları müxtəlif müddətlərə azadlıqdan məhrum ediliblər. Ülvi Həsənli, Sevinc Vaqifqızı, Hafiz Babalı və Fərid Mehralızadə 9 il, Nərgiz Absalamova və Elnarə Qasımova 8 il, Məhəmməd Kekalov isə 7 il 6 ay azadlıqdan məhrum edilib.
Onlar qaçaqmalçılıq və digər cinayətlərdə ittiham olunurlar. Jurnalistlər isə bu ittihamları rədd edir və həbslərinin korrupsiya araşdırmalarına görə siyasi sifariş olduğunu bildirirlər.
