İstanbul Küçükçekmece Baş Prokurorluğunun apardığı istintaq nəticəsində Habertürk, Show TV və Bloomberg HT də daxil olmaqla, Can Holdinqə məxsus media qurumlarının əmlak və aktivləri müsadirə olunub.

Həmin kanallar 2024-cü ildə Can Holdinq tərəfindən satın alınmışdı. İstintaq çərçivəsində holdinqin rəhbərləri Mehmet Şakir Can, Kemal Can və Kenan Tekdağ da daxil olmaqla, ümumilikdə 10 nəfər barəsində həbs qərarı çıxarılıb.

Onlara qarşı cinayət təşkilatı qurmaq, qaçaqmalçılıq, dələduzluq və çirkli pulların yuyulması ittihamları irəli sürülüb.

Ümumilikdə Can Holdinqə bağlı 121 şirkət müsadirə edilərək Türkiyə Əmanət Sığorta Fonduna (TMSF) təhvil verilib. Fond maliyyə və hüquqi problemlərlə üzləşmiş şirkətlərin müvəqqəti idarəçiliyini həyata keçirir, onların fəaliyyətini davam etdirməklə yanaşı, mülkiyyətin qorunmasını təmin edir və istintaq proseslərinə dəstək göstərir.

Habertürk və Show TV uzun illərdir Türkiyə mediasında böyük izləyici auditoriyasına sahibdir. Bloomberg HT isə iqtisadi və maliyyə xəbərləri üzrə ixtisaslaşmış televiziya kanalı kimi tanınır.

Adları çəkilən şəxslərin ittihamlara münasibəti hələlik açıqlanmayıb.