Sumqayıt şəhərində sahibkar Azər Babayev (1989-cu il təvəllüdlü, ad və soyad şərtidir) həyat yoldaşı Samirə Babayeva (1993-cü il təvəllüdlü, ad və soyad şərtidir) ilə bağlı şübhələr səbəbindən onu amansızlıqla qətlə yetirib. Hadisə şəhərin 12-ci mikrorayonunda baş verib.

Məlumata görə, cütlüyün birgə nigahından 3 övladı var. Bir müddət ər-arvad arasında normal münasibət olsa da, Azər həyat yoldaşından şübhələnib və onun telefonundakı “WhatsApp” mesencerini öz mobil telefonuna yönləndirərək izləməyə başlayıb. Sonradan o, başqa bir kişinin Samirəyə mesaj yazdığını görüb.

Azər mobil telefonunun səsyazma proqramını evin girişindəki dolaba qoyaraq iki gün ərzində bütün səsləri qeydə alıb. Daha sonra səs yazılarına qulaq asanda, evə başqa bir kişinin gəldiyindən əmin olub.

Gecə saat 3 radələrində həyat yoldaşını oyadaraq həmin səsin kimə məxsus olduğunu soruşan Azər, Samirə heç nəyi etiraf etmədiyi üçün üzərindəki bıçaqla ona 18 bıçaq zərbəsi endirərək qətlə yetirib.

Cinayətdən sonra Azər Babayev könüllü şəkildə polisə təslim olub və hadisəni etiraf edib. Polis əməkdaşları onu saxlayaraq istintaqa təhvil verib.

Sumqayıt Ağır Cinayətlər Məhkəməsinin hökmü ilə Azər Babayev 18 il azadlıqdan məhrum edilib.