Bakı sakini, 39 yaşlı Raidə Mahmudova ərini ehtiyatsızlıq nəticəsində öldürməkdə təqsirli bilinib və məhkəmə tərəfindən 1 il 6 ay müddətinə azadlıqdan məhrum edilib.

İttihama görə, hadisə Xətai rayonu ərazisində baş verib. Raidə Mahmudova birgə yaşadığı mənzildə ərilə mübahisə zamanı Hacı Mahmudovun baş nahiyəsinə küt alətlə zərbə endirib, daha sonra onu çarpayıdan yerə itələyib. Aldığı xəsarətlər nəticəsində Hacı Mahmudov hadisə yerində ölüb.

Prokurorluq hadisə ilə bağlı R. Mahmudovaya Cinayət Məcəlləsinin 126.3-cü (qəsdən sağlamlığa ağır zərər vurma, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham irəli sürmüşdü. Bu maddə 9 ildən 12 ilədək azadlıqdan məhrumetmə cəzası nəzərdə tutur.

Lakin Bakı Ağır Cinayətlər Məhkəməsində hakim Vüqar Quliyevin sədrlik etdiyi kollegiya hadisəni daha yüngül — Cinayət Məcəlləsinin 124-cü (ehtiyatsızlıqdan adam öldürmə) maddəsinə uyğun hesab edib. Nəticədə Raidə Mahmudova 1 il 6 ay müddətinə azadlıqdan məhrum edilib.

Məhkəmənin qərarına əsasən, o, cəzasını məntəqə tipli cəzaçəkmə müəssisəsində çəkəcək. Bu tip müəssisələrdə cəza çəkən məhkumlara müəyyən şərtlər daxilində müəssisə hüdudlarını tərk etməyə icazə verilir.

Cəza müddəti xanım müttəhimin tutulduğu tarixdən — 25 oktyabr 2024-cü ildən hesablanır. Yuxarı instansiya məhkəmələri hökmü qüvvədə saxlayarsa, Raidə Mahmudova təxminən 6 ay sonra azadlığa buraxılacaq.