Şəki rayonunun Vərəzət kəndində oğurluq və qəsdən yanğın hadisəsi baş verib.

Hadisə gecə saatlarında qeydə alınıb. Naməlum şəxs evlərdən birinə daxil olaraq 3 min manat dəyərində qızıl-zinət əşyalarını və təxminən 2 min manat pulu oğurlayıb. Daha sonra iz itirmək məqsədilə həmin evi yandırıb.

Daxili İşlər Nazirliyinin Mətbuat Xidmətinin Şəki regional qrupundan verilən məlumata görə, Şəki Şəhər Rayon Polis Şöbəsinin əməkdaşlarının keçirdiyi əməliyyat-axtarış tədbirləri nəticəsində hadisəni törətməkdə şübhəli bilinən 30 yaşlı Elmin Camalov saxlanılıb.

Məlum olub ki, E.Camalov zərərçəkmişin qonşusudur. O, evdə heç kimin olmamasından istifadə edərək mənzilə daxil olduğunu, oğurluq etdikdən sonra isə cinayəti gizlətmək məqsədilə evi yandırdığını etiraf edib.

Oğurlanmış pul və qızıl-zinət əşyaları saxlanılan şəxsin avtomobilindən və işlədiyi bərbərxanadan tapılaraq maddi sübut kimi istintaqa təqdim olunub.

Faktla bağlı araşdırmalar davam etdirilir.