Bakıda polisə bilərəkdən yalan məlumat verən taksi sürücüsü məsuliyyətə cəlb edilib.

Daxili İşlər Nazirliyinin Mətbuat Xidmətindən bildirilib ki, paytaxtda taksi fəaliyyəti ilə məşğul olan 42 yaşlı Hikmət Həsənov yanvarın 3-də Xətai rayonu ərazisində avtomobilinə müştəri kimi əyləşən naməlum şəxs tərəfindən hücuma məruz qaldığını iddia edərək polisə müraciət edib. Onun sözlərinə görə, həmin şəxs kəsici-deşici alətlə hədələyərək 80 manat pulunu talayıb.

Xətai Rayon Polis İdarəsinin 36-cı Polis Şöbəsinin əməkdaşları tərəfindən aparılan araşdırmalar zamanı bu məlumatın həqiqətə uyğun olmadığı müəyyən edilib. Məlum olub ki, sürücü müştərinin yolpulunu ödəməməsinə görə polisə qəsdən quldurluq hadisəsi ilə üzləşdiyi barədə yalan məlumat verib.

Hikmət Həsənov polis əməkdaşları tərəfindən saxlanılıb, faktla bağlı barəsində cinayət işi başlanılıb.

Hazırda istintaq araşdırmaları davam etdirilir.