Qəbul imtahanlarında qanunsuz texniki vasitələrdən istifadə ilə bağlı açılmış cinayət işi üzrə təqsirləndirilən Kamran Əsədov və Gündüz Abbasovun növbəti məhkəmə iclası keçirilib.

Məhkəmə prosesi hakim Elçin Məmmədovun sədrliyi ilə baş tutub. İclasda təqsirləndirilən şəxslərlə yanaşı, Dövlət İmtahan Mərkəzinin (DİM) nümayəndələri, şahidlər və proses iştirakçıları iştirak ediblər.

İttiham aktına əsasən, Kamran Əsədov və Gündüz Abbasov qabaqcadan əlbir olaraq cinayət əlaqəsinə giriblər və qəbul imtahanlarında nəticə əldə etmək məqsədilə qanunsuz texniki vasitələrdən istifadə ediblər. Belə ki, gizli kamera, səsötürücü funksiyalı “VIP smart” telefon, nano qulaqlıq, MİFİ cihazları və digər qurğular əvvəlcədən bir-biri ilə əlaqələndirilib, istifadəyə yararlılığı yoxlanılıb.

İstintaq materiallarında qeyd olunur ki, bu avadanlıqlar Gəncə və Bakı şəhərlərində keçirilən buraxılış və ali təhsil müəssisələrinə qəbul imtahanlarında ümumilikdə 15 abituriyentin üzərinə quraşdırılıb. Təqsirləndirilən şəxslər həmin abituriyentlərə imtahan zamanı kömək göstəriblər.

Məlumata görə, bu xidmətlərin qarşılığında Kamran Əsədov və Gündüz Abbasov müştərilərdən müxtəlif məbləğlərdə pul vəsaiti alaraq əldə olunan gəliri öz aralarında bölüşüblər.

Təqsirləndirilən şəxslərə Azərbaycan Respublikası Cinayət Məcəlləsinin 302.3-cü maddəsi (gizli informasiya əldə etmək üçün nəzərdə tutulmuş texniki vasitələrin qanunsuz satılması və ya satış məqsədilə əldə edilməsi) və 308.1-ci maddəsi (vəzifə səlahiyyətlərindən sui-istifadə) ilə ittiham elan edilib. Qeyd olunan maddələr üzrə 3 ilədək azadlıqdan məhrumetmə cəzası nəzərdə tutulur.

Məhkəmə araşdırmaları davam etdirilir.