Qarabağdan 11 nəfərin Ermənistana köçürüldüyü bildirilir. Bu barədə Ermənistanın əmək və sosial məsələlər naziri Arsen Torosyan məlumat yayıb.

Nazirin “Facebook” hesabında paylaşdığı məlumata görə, hazırda Azərbaycanda – Qarabağ bölgəsində yaşayan 10 erməni və 1 etnik rus Ermənistan Respublikasına köçürülmək üçün hər iki ölkənin müvafiq dövlət qurumlarına müraciət edib. Müraciətlərə baxıldıqdan sonra həmin şəxslərin Ermənistana köçürülməsi təmin olunub.

Arsen Torosyan qeyd edib ki, proses Azərbaycan və Ermənistanın aidiyyəti qurumları arasında razılaşdırılmış mexanizm çərçivəsində həyata keçirilib.

Xatırladaq ki, bu il yanvarın 14-də Ermənistanın Baş naziri Nikol Paşinyan Azərbaycanın dörd nəfər erməni əsilli şəxsi – Xaçaturyan Vaqif Çerkezi, Sujyan Gevorq Rubenoviç, Davtyan David Tiqrani və Eulcekciyan Vigen Abrahamı Ermənistana təhvil verdiyini açıqlamışdı. Həmin şəxslər Azərbaycanda qanunsuz silah saxlama, casusluq və digər cinayət əməllərində ittiham olunublar. Onlar isə irəli sürülən ittihamları qəbul etmədiklərini bildiriblər.

Qeyd edək ki, Azərbaycan və Ermənistan arasında Qarabağ münaqişəsi səbəbindən 30 ildən artıq davam edən gərginlik və müəyyən dövrlərdə hərbi toqquşmalar yaşanıb. 2023-cü ildə Azərbaycan öz ərazi bütövlüyünü tam bərpa etsə də, sülh danışıqları uzun müddət nəticəsiz qalıb.

Nəhayət, ötən il avqustun 8-də ABŞ-nin vasitəçiliyi ilə Azərbaycan və Ermənistan arasında sülh sazişi paraflanıb. ABŞ Prezidentinin iştirakı ilə keçirilən görüşdən sonra tərəflər birgə bəyannamə imzalayıblar. Bəyannaməyə əsasən, Ermənistanın cənubundan keçməklə Azərbaycanın əsas hissəsi ilə Naxçıvan arasında maneəsiz nəqliyyat əlaqəsinin yaradılması, eləcə də tərəflərin bir-birinin ərazi bütövlüyünü tanıması və qarşılıqlı iddialardan imtina etməsi nəzərdə tutulur.