Milli Şuranın Koordinasiya Mərkəzinin üzvü, keçmiş deputat Gültəkin Hacıbəylinin saxlanıldığı bildirilir.

Azadlıq qəzetinin yaydığı məlumata görə, o, Dövlət Təhlükəsizliyi Xidməti (DTX) tərəfindən saxlanılıb və evində axtarış aparılıb. Hazırda onun dindirilmək üçün DTX-yə aparıldığı qeyd olunur.

Xatırladaq ki, Gültəkin Hacıbəyli ötən ilin dekabrında Türkiyədə saxlanılmış, daha sonra Azərbaycana deportasiya olunmuşdu.

Onun sabiq Prezident Administrasiyası rəhbəri Ramiz Mehdiyevə qarşı açılmış cinayət işi çərçivəsində saxlanıldığı güman edilir. Ramiz Mehdiyevə qarşı cinayət işi ötən ilin oktyabrında başlanıb və barəsində ev dustaqlığı qətimkan tədbiri seçilib.

Ona Cinayət Məcəlləsinin 278.1 (hakimiyyəti zorla ələ keçirməyə və konstitusiya quruluşunu zorla dəyişməyə yönələn hərəkətlər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham irəli sürülüb. Ramiz Mehdiyevin ittihamlara münasibəti açıqlanmayıb.

Eyni iş çərçivəsində Azərbaycan Xalq Cəbhəsi Partiyasının (AXCP) sədri Əli Kərimli və AXCP Ali Məclisinin katibi Məmməd İbrahim də həbs olunublar. Onlar ittihamları rədd edir və həbslərinin siyasi sifariş əsasında həyata keçirildiyini bildirirlər.

Hökumətyönlü mətbuatda Ramiz Mehdiyevin hakimiyyəti dəyişmək məqsədilə Gültəkin Hacıbəyli ilə əməkdaşlıq etdiyi iddia olunub. Gültəkin Hacıbəyli isə daha əvvəl “Toplum TV”yə açıqlamasında bu ittihamları rədd edərək, Ramiz Mehdiyevin vəzifədə olduğu dövrdə ona qarşı düşmənçilik apardığını bəyan edib.