ABŞ-nin American Airlines şirkətinə məxsus sərnişin təyyarəsi Medellində eniş zamanı atəşə tutulub.

Bu barədə ABC News məlumat yayıb. Bildirilir ki, təyyarə Medellindən Mayami istiqamətində uçuş həyata keçirərkən gövdəsində güllə izləri aşkarlanıb.

Rəsmi şəxslərin sözlərinə görə, insident zamanı xəsarət alan olmayıb. İlkin araşdırmalar hadisənin bazar günü təyyarənin Medellində enişi zamanı baş verdiyini göstərir.

Şirkətdən bildirilib ki, təyyarənin xarici hissəsində “dəlik” aşkarlanıb. Problem Mayamiyə qayıtdıqdan sonra planlı texniki baxış zamanı üzə çıxıb. Təyyarə dərhal istismardan çıxarılıb və əlavə yoxlama, eləcə də təmir üçün göndərilib.

“Flightradar24” məlumatına görə, “Boeing 737 MAX 8” tipli hava gəmisi bazar ertəsi səhər Medellindən Mayamiyə uçub, həmin gün axşam isə Mayamidən Dallas istiqamətində hərəkət edib. Qeyd olunur ki, Dallas-Fort-Uert şəhəri “American Airlines”ın baş qərargahının yerləşdiyi məkandır və təyyarə tam təmir üçün ora göndərilib.

Şirkət açıqlamasında vurğulayıb ki, aşkarlanan qüsur təyyarənin idarə olunmasına hər hansı təsir göstərməyib. Hadisənin səbəbləri araşdırılır, mümkün ssenarilər, o cümlədən cinayətkar qruplaşmanın iştirakı ehtimalı da nəzərdən keçirilir.