[

Ukraynalı boksçu Aleksandr Usik sahib olduğu bütün çempionluq kəmərlərindən imtina etdiyini açıqlayıb.

Boksçu bu barədə sosial şəbəkə hesabında yayımladığı video müraciətdə bildirib. Usik hazırda əlində olan kəmərləri vakant elan etmək istədiyini deyib.

“Bu gün sahib olduğum bütün kəmərləri boş buraxmaq istəyirəm ki, növbədə dayanan digər boksçular onlar uğrunda döyüşə bilsinlər”, — deyə Usik bildirib.

Ukraynalı idmançı bununla karyerasını bitirmədiyini də vurğulayıb. Onun sözlərinə görə, qarşıda hələ “son rəqs” adlandırdığı bir döyüş planı var.

Usik qərarının düşünülmüş addım olduğunu və onun üçün yeni imkanlar aça biləcəyini qeyd edib.

Daha sonra boksçunun nümayəndəsi Sergey Lapin açıqlamasında bildirib ki, Usik karyerasını ABŞ-da başa vurmaq istəyir. Onun sözlərinə görə, ukraynalı boksçu son döyüşlərinin məhz ABŞ-da keçirilməsini arzulayır.

Lapin həmçinin bildirib ki, Usikin titullardan imtinası digər boksçulara, o cümlədən britaniyalı Entoni Coşuaya həmin kəmərlər uğrunda mübarizə aparmaq imkanı yarada bilər.

Qeyd edək ki, Usik daha əvvəl Entoni Coşuaya iki dəfə qalib gəlib.