ABŞ Müdafiə Nazirliyi (Pentaqon) İsrail və İran arasında artan gərginliyə cavab olaraq Yaxın Şərqə əlavə qırıcı təyyarələr yerləşdirir. Bu barədə “Reuters” agentliyi məlumat yayıb.

Məlumata görə, bölgəyə F-16, F-22 və F-35 tipli yüksək texnologiyalı döyüş təyyarələri göndərilir. Mənbələr vurğulayıb ki, bu addım əsasən müdafiə məqsədi daşıyır və regiondakı müttəfiqlərin təhlükəsizliyini təmin etməyə yönəlib.

Pentaqon məsələ ilə bağlı hələlik rəsmi açıqlama verməyib.

İsrailin baş naziri Benyamin Netanyahu isə iyunun 15-də “Fox News” telekanalına verdiyi müsahibəsində bildirib ki, ABŞ İranın İsrailə qarşı mümkün cavab zərbələrinin qarşısını almaqda onlara yardım göstərir. Onun sözlərinə görə, Vaşinqton bölgədəki sabitliyə dəstək məqsədilə İsrail qüvvələrinə texniki və hərbi yardımı artırır.

Xatırladaq ki, son həftələrdə İsrail və İran arasında birbaşa və dolayı zərbə mübadiləsi intensivləşib. Bəzi ekspertlər ABŞ-ın bu yerləşdirməsini gələcək eskalasiyanın qarşısını almağa yönəlmiş qabaqlayıcı addım kimi qiymətləndirirlər.