Bakıda adam bıçaqlamaqda ittiham olunan keçmiş diplomat Emin İbrahimovun barəsində çıxarılmış hökmdən verdiyi kasasiya şikayətinə baxılıb.

Azərbaycan Respublikası Ali Məhkəməsində keçirilən prosesdə qərar elan edilib. Qərara əsasən, Emin İbrahimovun kasasiya şikayəti təmin edilməyib və əvvəlki məhkəmə instansiyalarının qərarı qüvvədə saxlanılıb.

Qeyd edək ki, hadisə 2024-cü ildə Bakının Nizami rayonunda baş verib. İttihama görə, Emin İbrahimov Qaraçuxur sakini Kamal Hacıəli oğlu Şükürovla mübahisə zamanı ona bıçaqla xəsarət yetirib.

Sabiq diplomat Cinayət Məcəlləsinin 126.2.4-cü (ümumi təhlükəli üsulla, xuliqanlıq niyyəti ilə qəsdən sağlamlığa ağır zərər vurma) və 221.3-cü (silahdan və ya silah qismində istifadə olunan əşyalardan istifadə edilməklə törədilən xuliqanlıq) maddələri ilə təqsirli bilinib.

Bakı Ağır Cinayətlər Məhkəməsinin hökmü ilə o, 7 il müddətinə azadlıqdan məhrum edilib. Onun apellyasiya şikayəti də təmin olunmamışdı.

Xatırladaq ki, Emin İbrahimov 2007–2020-ci illərdə diplomatik xidmətdə çalışıb. O, 2012–2016-cı illərdə Azərbaycanın ABŞ-dəki səfirliyində, 2016–2019-cu illərdə isə Azərbaycanın Uruqvaydakı diplomatik nümayəndəliyində fəaliyyət göstərib.