İşğaldan azad edilmiş ərazilərdə həyata keçirilən genişmiqyaslı bərpa və yenidənqurma layihələri çərçivəsində inşa olunan Əhmədbəyli–Füzuli–Şuşa avtomobil yolu ödənişli yol statusu alıb.

Məlumata görə, Nazirlər Kabineti-nin 1 aprel 2026-cı il tarixli qərarı ilə sözügedən yol alternativ ödənişli avtomobil yolu kimi müəyyən edilib. Qanunvericiliyə əsasən, vətəndaşlar keyfiyyətli ödənişsiz yol mövcud olduğu halda ödənişli marşrutdan istifadə edib-etməmək barədə seçim etmək hüququna malikdirlər.

Yeni tariflər necə olacaq?

Tarif (qiymət) Şurası-nın 1 iyun tarixli iclasında yol üzrə aşağıdakı tariflər təsdiqlənib:

* Minik avtomobilləri və 3,5 tona qədər yük maşınları üçün – 1 km-ə 8,6 qəpik, bütün marşrut üzrə 6,99 manat;
* 3,5 tondan ağır yük avtomobilləri və xüsusi texnikalar üçün – 1 km-ə 10,6 qəpik, ümumilikdə 8,62 manat;
* Avtobuslar üçün – 1 km-ə 7,1 qəpik, marşrut üzrə 5,77 manat;
* Qoşqulu, yarımqoşqulu və 3 və daha çox oxlu nəqliyyat vasitələri üçün – 1 km-ə 17,7 qəpik, ümumilikdə 14,39 manat;
* Motosikletlər üçün isə Əhmədbəyli–Füzuli–Şuşa yolunda 1 km-ə 4,65 qəpik ödəniş müəyyən edilib.

Sürücülər üçün hansı üstünlüklər var?

Yeni magistral ənənəvi marşrutla müqayisədə 19,7 kilometr daha qısadır. Həmçinin yolda daha yüksək sürət həddi tətbiq olunduğundan sürücülər həm vaxt, həm də yanacaq sərfiyyatına qənaət edə biləcəklər.

Toplanan vəsait hara yönəldiləcək?

Ödənişli yollardan əldə edilən gəlirlər avtomobil yollarının saxlanılması, təmiri, mühafizəsi, yeni magistralların tikintisi və idarə olunması, eləcə də yol infrastrukturunun inkişafı üçün istifadə olunacaq.

Qərar 2026-cı il iyunun 2-dən qüvvəyə minəcək. Bundan əlavə, Tarif Şurasının iclasında 184 dərman vasitəsinin də qiymətləri yenidən tənzimlənib.