Azərbaycanda təxribatın törədilmə üsullarına əməli süni intellekt texnologiyalarından və xüsusi proqram təminatlarından istifadə halları da daxil ediləcək.

Bu məsələ Milli Məclisin bu gün keçirilən iclasında müzakirə olunan Cinayət Məcəlləsinə dəyişiklik edilməsi barədə qanun layihəsində əksini tapıb.

Qanun layihəsinə əsasən, Azərbaycanın müdafiə qabiliyyətini, iqtisadi təhlükəsizliyini və elmi-texniki potensialını zəiflətmək məqsədilə kritik infrastrukturun, enerji və nəqliyyat sistemlərinin, telekommunikasiya şəbəkələrinin və digər mühüm obyektlərin məhv edilməsi, zədələnməsi və ya fəaliyyətinin pozulmasına yönələn təxribat əməlləri, o cümlədən əməli süni intellekt texnologiyalarından və xüsusi proqram təminatlarından istifadə etməklə törədildikdə 8 ildən 15 ilədək azadlıqdan məhrumetmə ilə cəzalandırılacaq.

Eyni əməllər:
• mütəşəkkil dəstə və ya cinayətkar birlik tərəfindən törədildikdə,
• fövqəladə və ya hərbi vəziyyət zamanı baş verdikdə,
• vəzifə səlahiyyətlərindən istifadə olunmaqla həyata keçirildikdə,
• ehtiyatsızlıqdan insan ölümünə və ya ağır nəticələrə səbəb olduqda,

12 ildən 20 ilədək azadlıqdan məhrumetmə ilə cəzalandırılacaq.

Layihəyə görə, təxribatın hazırlanmasında iştirak edən şəxs vaxtında hakimiyyət orqanlarına məlumat verərək cinayətin qarşısının alınmasına kömək edərsə və əməlində başqa cinayət tərkibi olmazsa, cinayət məsuliyyətindən azad edilə bilər.

Müzakirələrdən sonra qanun layihəsi səsverməyə çıxarılaraq I oxunuşda qəbul edilib.