Həbsdə olan tədqiqatçı və sülh fəalı Bəhruz Səmədov 1 il müddətinə Umbakı qəsəbəsindəki qapalı rejimli cəzaçəkmə müəssisəsinə köçürülüb. Bu barədə Toplum TV-yə ictimai fəal Əmrah Təhməzov məlumat verib.

Dekabrın 1-də 11 saylı Cəzaçəkmə Müəssisəsində B.Səmədovun saxlanıldığı yerdə qapalı məhkəmə prosesi keçirilib. Prosesdə fəalın yaxınları iştirak edə bilməyib. Məhkəmə, cəzaçəkmə müəssisəsinin rəhbərliyinin vəsatəti əsasında, onun Umbakı Penitensiar Kompleksinə 1 illik köçürülməsinə qərar verib. Müdafiə tərəfi qərardan apellyasiya şikayəti verməyi planlaşdırır.

B.Səmədovun yeganə ailə üzvü, 82 yaşlı nənəsi Zibeydə Osmanova, Umbakıya gedib-gəlmənin onun yaşı və səhhəti üçün əlverişli olmadığını bildirir və nəvəsinin günahsız olduğunu vurğulayır. Qeyd olunur ki, B.Səmədov həbsdə iki dəfə intihara cəhd edib və hər dəfə xilas olunub.

Çexiyanın Karlov Universitetinin doktorantı olan Bəhruz Səmədov 2024-cü il avqustun 21-də Dövlət Təhlükəsizliyi Xidmətinin əməkdaşları tərəfindən həbs olunub. 2025-ci il iyunun 23-də Bakı Ağır Cinayətlər Məhkəməsinin hökmü ilə 15 il müddətinə azadlıqdan məhrum edilib. Fəal sülh fəaliyyəti və dövlətə xəyanət ittihamı ilə məhkum edilib. Cinayət işində iddia olunur ki, o, Ermənistan xüsusi xidmət orqanları ilə əməkdaşlıq edib.

Bəhruz Səmədov məhkəmələrdə bildirib ki, heç vaxt Dağlıq Qarabağın Ermənistan ərazisi olduğunu deməyib və daim sülhü müdafiə edib. O, dövlətlər arasında müharibəyə və bunun nəticəsində insanların həlak olmasına qarşı olduğunu vurğulayıb.